Cyhoeddi Cynigion Drafft Arolwg Cymunedol Bro Morgannwg
Heddiw (5 Medi) mae Comisiwn Ffiniau a Democratiaeth Leol Cymru wedi cyhoeddi ei Gynigion Drafft wrth i’r Arolwg Cymunedol o Fro Morgannwg fynd rhagddo.
Rhennir Bro Morgannwg yn 27 o Gymunedau, ac mae gan bob un ohonynt eu Cyngor Tref neu Gymuned eu hunain, ar wahân i Gymuned y Rhws.
Mae'r Arolwg Cymunedol yn ystyried yr holl ffiniau Cymunedol ym Mro Morgannwg, gyda newidiadau i'r ffiniau hynny'n bosibl lle nodir angen.
Gellid hefyd newid Ffiniau Wardiau Cymunedol, ynghyd â threfniadau etholiadol Cynghorau Tref neu Gymuned, er enghraifft nifer y Cynghorwyr sy'n cael eu hethol i gynghorau.
Mae newidiadau i Ffiniau Cymunedol yn fwyaf tebygol mewn ardaloedd lle bu newidiadau sylweddol yn ystod y blynyddoedd diwethaf, er enghraifft lle mae stad o dai newydd wedi'i hadeiladu sy'n croesi ffin gymunedol bresennol.
Mae ymgynghoriad y Comisiwn bellach ar agor ac yn dod i ben ar 30 Hydref. Gall aelodau’r cyhoedd gyflwyno eu barn ynghylch a ddylai fod unrhyw newidiadau i’w Cymunedau ai peidio, ac yn wir pa newidiadau y dylid eu gwneud, drwy anfon e-bost at ymgynghoriadau@ffiniau.cymru neu drwy ysgrifennu yn y post at Gomisiwn Ffiniau a Democratiaeth Leol Cymru, Tŷ Hastings, Caerdydd. CF24 0BL.
Bydd y Comisiwn yn ystyried yr holl gynrychiolaethau a ddaw i law yn ystod yr ymgynghoriad cyn cyhoeddi ei Argymhellion Terfynol.
Wrth wneud sylwadau ar agor yr ymgynghoriad, dywedodd Prif Weithredwr Comisiwn Ffiniau a Democratiaeth Leol Cymru, Shereen Williams MBE OStJ:
“Mae’n bleser gan y Comisiwn gyhoeddi ei Gynigion Drafft ar gyfer Arolwg Cymunedol Bro Morgannwg.
“Cymunedau yw’r lefel o lywodraeth sydd agosaf at y bobl, ac mae’n hanfodol eu bod yn parhau i gynrychioli pobol yn gywir ym mhob rhan o Fro Morgannwg.
“Mae gwefan y Comisiwn yn llawn gwybodaeth am yr Arolwg, ac am Gymunedau yn gyffredinol felly byddwn yn annog pawb i ddarganfod mwy am yr hyn y gallai’r newidiadau ei olygu iddyn nhw, ac i gyflwyno eu barn cyn 30 Hydref.”