Cyhoeddi Cynigion Drafft Arolwg Cymunedol Ceredigion
Mae Comisiwn Ffiniau a Democratiaeth Leol Cymru (19 Mawrth) wedi cyhoeddi ei Gynigion Drafft ar gyfer y trefniadau Cymunedol newydd yng Ngheredigion.
Rhennir Ceredigion yn 51 o Gymunedau, y mae gan bob un ohonynt Cyngor Tref neu Gymuned.
Mae'r Arolwg Cymunedol yn archwilio holl ffiniau'r Gymuned yng Ngheredigion, a chynigir newidiadau i'r ffiniau hynny lle nodir angen.
Mae Ffiniau Wardiau Cymunedol hefyd yn agored i newid, ynghyd â threfniadau etholiadol Cynghorau Tref neu Gymuned, er enghraifft nifer y Cynghorwyr sy'n cael eu hethol i gynghorau.
Mae newidiadau i Ffiniau Cymunedol yn fwyaf tebygol mewn ardaloedd lle bu newidiadau sylweddol yn y blynyddoedd diwethaf, er enghraifft lle mae stad o dai newydd wedi'i hadeiladu sy'n croesi ffin Gymunedol bresennol.
Fodd bynnag, mae newidiadau hefyd wedi’u cynnig i ffiniau cymunedau yng Ngheredigion mewn ymateb i’r cynrychiolaethau a ddaeth i law yn ystod ymgynghoriad cychwynnol y Comisiwn.
Mae ymgynghoriad y Comisiwn bellach ar agor ac yn dod i ben ar 13 Mai. Gall aelodau’r cyhoedd gyflwyno eu barn ar y Cynigion Drafft drwy e-bostio ymgynghoriadau@ffiniau.cymru neu drwy ysgrifennu yn y post i Gomisiwn Ffiniau a Democratiaeth Leol Cymru, Tŷ Hastings, Caerdydd, CF24 0BL.
Bydd y Comisiwn yn ystyried yr holl gynrychiolaethau a ddaw i law yn ystod yr ymgynghoriad cyn cyhoeddi ei Gynigion Terfynol.
Wrth wneud sylwadau ar agor yr ymgynghoriad, dywedodd Prif Weithredwr Comisiwn Ffiniau a Democratiaeth Leol Cymru, Shereen Williams MBE OStJ:
“Cymunedau yw’r lefel o lywodraeth sydd agosaf at y bobl, ac mae’n hanfodol eu bod yn parhau i gynrychioli pobol yn gywir ym mhob rhan o Geredigion.
“Mae’r Comisiwn wedi ystyried y dirwedd dai newidiol, ffiniau naturiol, cysylltiadau cymunedol, ac iechyd democrataidd cynghorau tref a chymuned ar draws Ceredigion wrth ddatblygu ei gynigion.
“Fodd bynnag, mae angen i ni nawr glywed gan bobl Ceredigion fel ein bod ni yn y sefyllfa orau bosib i gynhyrchu argymhellion terfynol sy’n cwrdd ag anghenion trigolion y sir.
“Mae gwefan y Comisiwn yn llawn gwybodaeth am yr Arolwg, ac am Gymunedau yn gyffredinol felly byddwn yn annog pawb i ddarganfod mwy am yr hyn y gallai’r newidiadau ei olygu iddyn nhw, ac i gyflwyno eu barn cyn 13 Mai.”