Arolwg Cymunedol Bro Morgannwg yn dechrau
Heddiw (1 Chwefror) mae Comisiwn Ffiniau a Democratiaeth Leol Cymru wedi agor ei Ymgynghoriad Cychwynnol wrth i’r Arolwg Cymunedol o Fro Morgannwg ddechrau.
Rhennir Bro Morgannwg yn 27 o Gymunedau, ac mae gan bob un ohonynt eu Cyngor Tref neu Gymuned eu hunain, ar wahân i Gymuned y Rhws.
Bydd yr Arolwg Cymunedol yn edrych ar yr holl ffiniau Cymunedol ym Mro Morgannwg, gyda newidiadau posibl i'r ffiniau hynny lle nodir angen.
Gellid hefyd newid Ffiniau Wardiau Cymunedol, ynghyd â threfniadau etholiadol Cynghorau Tref neu Gymuned, er enghraifft nifer y Cynghorwyr sy'n cael eu hethol i gynghorau.
Mae newidiadau i Ffiniau Cymunedol yn fwyaf tebygol mewn ardaloedd lle bu newidiadau sylweddol yn y blynyddoedd diwethaf, er enghraifft lle mae stad o dai newydd wedi'i hadeiladu sy'n croesi ffin Gymunedol bresennol.
Fodd bynnag, gellid gwneud newidiadau i unrhyw ffiniau Cymunedol ym Mro Morgannwg os yw ymatebion i ymgynghoriad y Comisiwn yn nodi bod angen newid.
Mae ymgynghoriad y Comisiwn bellach ar agor ac yn dod i ben ar 28 Mawrth. Gall aelodau’r cyhoedd gyflwyno eu barn ynghylch a ddylai fod unrhyw newidiadau i’w Cymunedau ai peidio, ac yn wir pa newidiadau y dylid eu gwneud, drwy anfon e-bost at ymgynghoriadau@ffiniau.cymru neu drwy ysgrifennu yn y post at Gomisiwn Ffiniau a Democratiaeth Leol Cymru, Tŷ Hastings, Caerdydd. CF24 0BL.
Bydd y Comisiwn yn ystyried yr holl gynrychiolaethau a ddaw i law yn ystod yr ymgynghoriad cyn cyhoeddi ei Gynigion Drafft. Yna bydd y cynigion yn destun cyfnod ymgynghori pellach.
Wrth wneud sylwadau ar agor yr ymgynghoriad, dywedodd Prif Weithredwr Comisiwn Ffiniau a Democratiaeth Leol Cymru, Shereen Williams MBE OStJ:
“Cymunedau yw’r lefel o lywodraeth sydd agosaf at y bobl, ac mae’n hanfodol eu bod yn parhau i gynrychioli pobol yn gywir ym mhob rhan o Fro Morgannwg.
“Y rhai sydd â’r wybodaeth fwyaf ynghylch a ddylai eu cymunedau newid, a sut y dylent newid, fydd y rhai sy’n byw yno, felly byddwn yn annog pawb, beth bynnag yw eu barn, i ymateb i’n hymgynghoriad.”