Cyhoeddi Argymhellion Terfynol yn Arolwg Cymunedol Sir Benfro
Heddiw (29 Ionawr) mae Comisiwn Democratiaeth a Ffiniau Cymru wedi cyhoeddi ei argymhellion terfynol ar gyfer 77 o Gymunedau Sir Benfro, y mae rhai ohonynt yn wynebu newid.
Edrychodd yr Arolwg Cymunedol ar yr holl ffiniau Cymunedol yn Sir Benfro, gan argymell newidiadau i ffiniau lle nodwyd bod angen.
Argymhellir hefyd newid Ffiniau Wardiau Cymunedol, ynghyd â threfniadau etholiadol Cynghorau Tref neu Gymuned.
Cynhaliodd y Comisiwn ddau gyfnod ymgynghori ar wahân yn ystod yr Arolwg, gan arwain at gyflwyno 93 o gynrychiolaethau gan y cyhoedd a rhanddeiliaid.
Gall y rhai sydd am wneud sylwadau ar argymhellion terfynol y Comisiwn wneud hynny drwy ysgrifennu at y Tîm Democratiaeth Llywodraeth Leol, Is-adran Polisi Llywodraeth Leol, Llywodraeth Cymru, Parc Cathays, Caerdydd, CF10 3NQ, neu drwy e-bost at: LGPolicy.Correspondence@gov.wales.
Ymhlith yr argymhellion a wnaed gan y Comisiwn mae:
- Bod Sir Benfro yn parhau i fod â 77 o gymunedau
- Gostyngiad cyffredinol yn nifer y cynghorwyr tref a chymuned o 689 i 621.
- Newidiadau i 64 o Drefi a Chymunedau, gyda'r 13 arall heb eu newid.
- Uchafswm Maint Cyngor o 18 cynghorydd ac isafswm o 6 chynghorydd.
Wrth wneud sylwadau ar gyhoeddi’r argymhellion terfynol, dywedodd Prif Weithredwr Comisiwn Democratiaeth a Ffiniau Cymru, Shereen Williams MBE OStJ:
“Hoffai’r Comisiwn ddiolch i’n partneriaid yng nghyngor Sir Benfro, cynghorau tref a chymuned, ac aelodau’r cyhoedd a gyflwynodd eu barn ar eu cymunedau drwy gydol yr Arolwg hwn.
“Mae cymunedau’n rhan hanfodol o ddemocratiaeth leol Cymru ac mae’n hanfodol eu bod yn parhau i gynrychioli pobl Sir Benfro yn gywir, ac y gallwn sicrhau iechyd democrataidd da ar bob lefel o lywodraeth yng Nghymru.
“Bydd yr argymhellion hyn yn helpu i sicrhau bod gan Sir Benfro gynghorau cymuned hyfyw a chadarn dros y blynyddoedd i ddod yn ogystal â darparu’r blociau adeiladu mwyaf priodol ar gyfer Arolygon etholiadol y Comisiwn o wardiau cyngor Sir Benfro yn y dyfodol.”
Mater i Lywodraeth Cymru a’i Gweinidogion yn awr yw penderfynu sut i symud ymlaen. Fel arfer byddant yn gwneud Gorchymyn i roi effaith i'r argymhellion.